ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਅਤੇ ਕੇਂਦਰੀ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਵਿਚਾਲੇ ਸ਼ਬਦੀ ਜੰਗ ਹੁਣ ਇੱਕ ਨਵੇਂ ਮੋੜ 'ਤੇ ਪਹੁੰਚ ਗਈ ਹੈ। ਜਿੱਥੇ ਸੰਸਦ ਦੇ ਗੇਟ 'ਤੇ ਦੋਵਾਂ ਆਗੂਆਂ ਵਿਚਾਲੇ ਤਿੱਖੀ ਬਹਿਸ ਹੋਈ, ਉੱਥੇ ਹੀ ਹੁਣ ਪੰਜਾਬ ਕਾਂਗਰਸ ਨੇ ਸੋਸ਼ਲ ਮੀਡੀਆ 'ਤੇ ਇੱਕ ਵਿਵਾਦਤ AI (ਆਰਟੀਫੀਸ਼ੀਅਲ ਇੰਟੈਲੀਜੈਂਸ) ਵੀਡੀਓ ਸਾਂਝੀ ਕਰਕੇ ਸਿਆਸੀ ਪਾਰਾ ਹੋਰ ਚੜ੍ਹਾ ਦਿੱਤਾ ਹੈ।
ਸੰਸਦ ਦੇ ਗੇਟ 'ਤੇ ਆਹਮੋ-ਸਾਹਮਣੇ ਹੋਏ ਦਿੱਗਜ ਘਟਨਾ ਬੁੱਧਵਾਰ ਦੀ ਹੈ ਜਦੋਂ ਸੰਸਦ ਕੰਪਲੈਕਸ ਦੇ ਗੇਟ ਨੇੜੇ ਰਾਹੁਲ ਗਾਂਧੀ ਅਤੇ ਰਵਨੀਤ ਬਿੱਟੂ ਦਾ ਸਾਹਮਣਾ ਹੋਇਆ। ਮੌਕੇ 'ਤੇ ਮੌਜੂਦ ਲੋਕਾਂ ਅਨੁਸਾਰ, ਜਦੋਂ ਬਿੱਟੂ ਸੰਸਦ ਅੰਦਰ ਦਾਖਲ ਹੋ ਰਹੇ ਸਨ, ਤਾਂ ਰਾਹੁਲ ਗਾਂਧੀ ਨੇ ਉਨ੍ਹਾਂ ਨੂੰ ਦੇਖ ਕੇ ਤਨਜ਼ ਕਸਦਿਆਂ ਕਿਹਾ, "ਦੇਖੋ, ਇੱਕ ਗੱਦਾਰ ਆ ਰਿਹਾ ਹੈ... ਮੇਰੇ ਗੱਦਾਰ ਦੋਸਤ, ਚਿੰਤਾ ਨਾ ਕਰੋ, ਤੁਸੀਂ ਵੀ ਵਾਪਸ ਆ ਜਾਓਗੇ।" ਇਸ ਦੇ ਜਵਾਬ ਵਿੱਚ ਬਿੱਟੂ ਨੇ ਪਲਟਵਾਰ ਕਰਦਿਆਂ ਰਾਹੁਲ ਗਾਂਧੀ ਨੂੰ 'ਦੇਸ਼ ਦਾ ਦੁਸ਼ਮਣ' ਕਰਾਰ ਦਿੱਤਾ। ਦੱਸਿਆ ਜਾ ਰਿਹਾ ਹੈ ਕਿ ਰਾਹੁਲ ਗਾਂਧੀ ਨੇ ਹੱਥ ਮਿਲਾਉਣ ਦੀ ਕੋਸ਼ਿਸ਼ ਵੀ ਕੀਤੀ, ਪਰ ਬਿੱਟੂ ਗੁੱਸੇ ਵਿੱਚ ਸਿੱਧਾ ਅੰਦਰ ਚਲੇ ਗਏ।
ਪੰਜਾਬ ਕਾਂਗਰਸ ਦਾ 'ਸੁਰੀਲਾ ਹਮਲਾ' ਇਸ ਵਿਵਾਦ ਨੂੰ ਅੱਗੇ ਵਧਾਉਂਦਿਆਂ ਪੰਜਾਬ ਕਾਂਗਰਸ ਨੇ ਆਪਣੇ ਅਧਿਕਾਰਤ ਪੇਜ 'ਤੇ ਇੱਕ ਏਆਈ ਵੀਡੀਓ ਗਾਣਾ ਜਾਰੀ ਕੀਤਾ ਹੈ। ਮਸ਼ਹੂਰ ਬਾਲੀਵੁੱਡ ਗੀਤ ‘ਬੱਬਲੀ ਬਦਮਾਸ਼ ਹੈ’ ਦੀ ਤਰਜ਼ 'ਤੇ ਬਣਾਏ ਗਏ ਇਸ ਗਾਣੇ ਦੇ ਬੋਲ ‘ਬਿੱਟੂ ਗੱਦਾਰ ਹੈ’ ਰੱਖੇ ਗਏ ਹਨ। ਇਸ ਵੀਡੀਓ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਰਵਨੀਤ ਬਿੱਟੂ ਨੂੰ ਦਿਖਾਇਆ ਗਿਆ ਹੈ, ਜਿਸ ਨੂੰ ਲੈ ਕੇ ਭਾਜਪਾ ਖੇਮੇ ਵਿੱਚ ਭਾਰੀ ਰੋਸ ਹੈ।
ਪ੍ਰਧਾਨ ਮੰਤਰੀ ਮੋਦੀ ਨੇ ਕੀਤਾ ਬਚਾਅ ਇਸ ਮੁੱਦੇ 'ਤੇ ਖ਼ੁਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸੰਸਦ ਵਿੱਚ ਬਿੱਟੂ ਦਾ ਪੱਖ ਪੂਰਿਆ। ਉਨ੍ਹਾਂ ਕਿਹਾ ਕਿ ਰਵਨੀਤ ਬਿੱਟੂ ਇੱਕ ਸਿੱਖ ਹਨ, ਇਸੇ ਲਈ ਕਾਂਗਰਸ ਉਨ੍ਹਾਂ ਨੂੰ ਨਿਸ਼ਾਨਾ ਬਣਾ ਰਹੀ ਹੈ। ਪੀ.ਐਮ. ਮੋਦੀ ਨੇ ਸਵਾਲ ਉਠਾਇਆ ਕਿ ਕਾਂਗਰਸ ਛੱਡ ਕੇ ਜਾਣ ਵਾਲੇ ਹੋਰ ਕਈ ਆਗੂਆਂ ਨੂੰ ਕਦੇ 'ਗੱਦਾਰ' ਨਹੀਂ ਕਿਹਾ ਗਿਆ, ਪਰ ਬਿੱਟੂ ਦੇ ਮਾਮਲੇ ਵਿੱਚ ਪਾਰਟੀ ਹੱਦਾਂ ਪਾਰ ਕਰ ਰਹੀ ਹੈ।
ਦੂਜੇ ਪਾਸੇ, ਕਾਂਗਰਸ ਦੇ ਤਮਾਮ ਸੀਨੀਅਰ ਆਗੂ ਇੱਕਜੁੱਟ ਹੋ ਕੇ ਬਿੱਟੂ 'ਤੇ ਹਮਲੇ ਕਰ ਰਹੇ ਹਨ। ਪਾਰਟੀ ਦਾ ਕਹਿਣਾ ਹੈ ਕਿ ਜਿਸ ਪਰਿਵਾਰ ਨੂੰ ਕਾਂਗਰਸ ਨੇ ਸਭ ਕੁਝ ਦਿੱਤਾ, ਉਸ ਦੇ ਵਾਰਿਸ ਵੱਲੋਂ ਪਾਰਟੀ ਨਾਲ ਕੀਤੀ ਗਈ ਬੇਵਫ਼ਾਈ ਨੂੰ ਕਦੇ ਮੁਆਫ਼ ਨਹੀਂ ਕੀਤਾ ਜਾ ਸਕਦਾ।
Social Plugin